Kouraj Madanm !!!

Yon malad grav. Plizyè doktè nan chanm lan. Yap diskite. Diagnostik la klè men yo pa vle antann yo sou tretman an. Yap pale anpil, yap joure nan tèt malad la. Yap trete youn lòt de kreten, de fo doktè. Pandanstan sa, malad la kouche toujou, lap fè soupi, li santi lap trepase. Fanmi l paka fè anyen pou li. Podiab! Si yo te kapab, se pa lopital yo tap vini ak li. Yo tap kenbe l lakay yo pou yo ba l ti te, ti beny. Tout paran yo mare vant yo, je yo chèch tèlman yo kriye. Yap priye doktè yo pou yo antann yo, paske se malad la yo vle sove. Men doktè yo soud. Yo pa wè, yo pa tande. Yap gonfle lestomak yo, chak di se yo ki gen solisyon an.

Jou ap pase, malad la toujou la ap soufri, ap jemi. Jou l yo konte. Li santi souf li ap vin pi kout. Li anvi pale, li pa kapab. De grenn je l louvri paske li pa gen domi ankò. Lap mande tèt li : « Ou kwè pil doktè sa yo ap kite l mouri vre, Jezi? Si yo pa ka sove l, kilès kap kapab??? »

Li fèmen je li epi li fè laplanch sou kabann lan. Li di tèt li : « KOURAJ MADANM!