Tout moun ap fè vwèl

Tout moun ap fè vwèl
Nan yon bato san kapitèn
Genyen ki deside fè bras
Nan lespwa ya rive anvan.
Tout je fikse sou lorizon…

Pandanstan pa bò isit,
Se yon l-a (la) g-o-t (got) lagot
Yon twa fwa pasera
Se ladènyè ki rèstera,
Yon jwèt marèl
Pou wè si na rive nan syèl
Yon sov ki pe,
Yon lespwa fè viv.
Lavi nou tounen yon jwèt bòlèt
Kote n’ap lapriyè lèsen lèzanj
Pou nimewo pa n’ nan soti
Pou n’ jete n’.

Kibò ? ki kote nou dwe byen ?
Nou mache san n’ pa konn
Kilè n’ap rive.
Gen nan nou ki rete nan wout
N’ap mache
Gen nan nou ki pèdi wout
N’ap mache
Gen nan nou ki pa gen wout
N’ap mache…

Kounya yo lage n’ nan kouri,
Y’ap chase n’ tankou bèt nan savann
Y’ap bwè san n’ tankou dlo kokoye
K’ap desann nan gagann.
Nou lage de bra pandye
N’ap siv de bra balan
N’ap rele de bra louvri.
Nou lage nan fon yon pànye
N’ap monte sou tèt zòt pou n’ wè si na soti
N’ap soufri ansanm
E piti piti n’ap peri ansanm.

Anwo menm jan ak anba,
Nan mitan menm kanpe rèd
Paske l’ pa konnen si pou l’ monte,
Si pou l’ desann.
N’ap gouye sou pil fatra
N’ap bwè kleren nan ma labou,
Kè kontan nou ak tristès nou fè yon sèl
Miwa lavi nou fè miyèt moso
Paske nou pè gade ladan l’
Pou nou pa wè eta figi lavi n’.

Lalin ak solèy, sa w pito ?
Si doulè lajounen
Pa t sanble ak doulè lannuit,
Si woch nan dlo
Pa t konn doulè wòch nan solèy,
Chwa t’ap fasil.
Men kounya nou tout nan menm bato,
Genyen k’ap dòmi je fèmen,
Gen lòt k’ap dòmi je louvri,
E gen sa k’ap kabicha,
Nou tout ap tan…
N ap tan…
N ap tan…
Men kisa souple?
Kisa wi?
… Pèsonn pa konnen!!!