tournesol Wouy !!! lanmou dous, li sikre, li gen yon ti gou myèl. Li fonn nan bouch menm jan ak krèm “cookies n cream”. Li fè ou fremi, fè ou tresayi tankou lè yon ti briz vin karese po ou lè lapli ap tonbe.
Lanmou bay kè sote lè pawòl ap sonnen zòrèy ou nan yon kout telefòn vè minui. Lè sa ou santi ou ta prete yon laye pou ou vwayaje al jwenn lanmou.
Lanmoun dezabiye kè ou, li kite l toutouni. Ou pa menm santi si l pa gen rad tèlman l’ap kouri san gade dèyè.
Lanmou fè Elizabeth bliye si aswè, je li dwe fèmen tèlman tout nanm li ap veye kote lanmou ap mennen l’. Li deside se la li prale menm si wout la long anpil. Li pap fatige. Dayè, si ou betize, zèl ap pouse nan do l’.
Elizabeth renmen gou lanmou paske li tou sikre. Li manje l’ je fèmen. Tout kò l’ fonn lè sansasyon sa anvayi l’. Li pa konn kibò pou l mete kò l tèlman li pèdi kontwòl.
Elizabeth gade lanmou nan je e sa li wè, li paka pale. Lanmou di l’ : « pa reflechi, m’ap panse pou ou ; pa pè, m’ap kenbe men ou ; rete avè m’, m pap janm kite ou ». Lanmou di l’ : « fè m konfyans, ou pap regrèt ». Elizabeth tande lanmou, li koute li e li fè sa vre.
Lanmou rakonte Elizabeth anpil sekrè. Li di l’ sa pap fasil men ansanm yo pi fò. Li di l’, nan je l’, li wè lalin ak solèy. Li di l’ yo klere menm jan ak zetwal yo.
Lanmou depatcha nanm Elizabeth pak an pak. Manmzèl pa di anyen paske lanmou tankou ji kann k’ap glise nan gòj li.
Lanmou fè Elizabeth bwè dlo pou manje e manje pen pou dlo. Lanmou fè li delala, krebete; li pa vo tèt li anyen. Tout lavi l’ se lanmou.
Lanmou sa tèlman dous, chak fwa Elizabeth wè yon nich foumi, li kouri pou yo pa anvayi l’ e pati ak li. Lè sa, kisa l’ t’ap fè ak lanmou???
Hmm…
0 Reviews
