Eske drapo n’ se fyète n’?

Depi nou piti, y’ap fè nou chante :
« Mon drapeau, peau, peau… »
Men depi n piti, y ap montre n’
“il faut diviser pour régner”
Y’ap pale n’ de « Fière Haiti »
Men y’ap montre n’ yon Ayiti ki modi.
Dessalines te fè koupe tèt boule kay
Pou mete blan yo deyò
Epi ban nou libète,
Kounya nou fè koupe tèt boule kay
Pou nou mete pwop frè nou deyò.
Pou kilès menm n’ap bale lakou a ?
Nou pa vle parèy nou evolye
Paske yo aprann nou ke
“depi nan ginen nèg rayi nèg”
Nou ranmase tout vye pawòl
Epi nou di n’ap fè peyi.
Se malere n’ap fè soufri
Nan mete pòch yo toutouni
Nou bliye ke sa ki sanble
Dwe rasanble,
E ke men anpil fè chay la pa lou.
Nou pèdi sans ble ak wouj la,
Nou jete fòs ki te reyini nou,
Nèg ak milat,
Lè nou t’ap reve kreye yon peyi
Lè nou te bouke pran souflèt
Nan men blan ki te di se li ki mèt.

Eske nou sonje « Mourir est beau »,
« Bechons joyeux »,
« Formons des fils »,
« Marchons unis » ?
Kisa nou fè ak «la tête altière
Et hauts les fronts?
Kounya nou pa pale des “Armes
de la République » ankò
men nou pale pito
de « la République des Armes »
paske tout kote
se katouch k’ap fè moun danse,
plane oubyen fè plake.
Port-au-Prince tounen « Port-aux-Crimes »
Gen yon raf k’ap tire tout jounen
Men pèsonn pa bezwen nimewo pa l soti.
Y’ap foure yon pil grenn nan bouch nou,
Men yo difisil pou n’ vale,
Yo kwoke nan gagann nou
Menm vomi nou paka vomi yo.
Tout je leve nan syèl,
N’ap veye kote lespwa ap soti.
Tout sous dlo tounen san
N’ap chache kote gen van
Pou nou mete van nan vwèl nou.

Ou kwè nap gen kouraj
Kanpe anba poto,
Nan lakou site drapo,
Nan jou Dessalines ak Petion
Pou nou di « Drapo n’ se fyète n’ » ?
Si zansèt nou yo te fè Vètyè,
Kibò nou menm n’ap kase randevou ?
Dèyè ki mèt nou gen pou n’ rele chal bare ?