Gade m nan je

Si Jozabèt kwaze ak Andre yon jou sou chimen lavi, gen anpil bagay l’ap di l’, anpil kesyon l’ap poze l sou lanmou alanvè sa li te pataje ak li.

Chak fwa li sonje sa musue te fè li, san li tounen dlo paske Andre te fè li kwè ke lanmou te fèt pou yo toulède, ke li te yon priyorite nan lavi l’ ; yon limyè nan fènwa l’, yon règ ki la pou l’ korije tout liy kwochi ki te deja trase nan lavi l’.

Si paralèl lavi yo te tounen pèpandikilè, li t’ap pran tan pou l’ di:

• Andre, gade m nan je. Kisa ou wè ? Desepsyon ? Tristès ? Rankin ? Gade m’ nan je e di m pouki se konsa ou chanje ray tren an san avèti m pandan m t ap tann ou nan stasyon pou m monte abò. Gade m nan je e di m pouki ou gaspiye tout bagay ki te egziste antre nou. Nou te yon si bèl pwezi, nòt mizik nou an te bèl nan zorèy tout moun. Tablo nou t’ap pentire a te atire pi gwo kritik sou latè, tout moun te jalou de li e te vle possède li. Dans nou t’ap danse te san parèy tèlman pa nou te akòde. Menm lespri nou te makònen ansanm paske nou te pale menm pawòl epi ri menm koze. Lanmou nou an t’ap koule tankou yon kaskad dlo nan Sodo. Gade m nan je e di m pouki ou deside fè gwo vuelta sa e kite m kanpe ap debat ak lavi pou kò m ! Gade m nan je e eksplike m pouki se yon lòt kap fè lawonn nan kè w !
  Andre, gade m nan je non, pou ou ka wè jan lanmou sa a pote ale tout krèm lavi m !