« Lanmou pataswèl »

Gen de lè si ou pa fè atansyon
Lanmou jere w tankou yon pataswèl
Se kan w pran ou konnen
Ou pa menm gentan eskive l’
Se pantan li fè w pantan
Menm lòlòj ou li vire
Li konn menm kite yon ti gou san nan bouch ou,
De je ou fèmen ou ap eseye sonje
Sikonstans ki depoze w la
Ki fè w wè minui a katòzè
Ki fè w bliye pile trèz epi w al pile katòz.

Lanmou gen yon jan li jere w tankou yon pataswèl,
Yon lanmou san mezi
Yon lanmou tchake tchake
Yon lanmou ale vini
Yon lanmou Lavalas ki bwote w kote l vle
Yon lanmou matisan k’ap viv nan kè sote
Yon lanmou di tankou rigòl dlo sal k’ap desann
Yon lanmou de grenn gòch ki p’ap mennen w ankenn kote

Gendelè lanmou jere w pi mal pase yon pataswèl
Se yon bis san fren k’ap desann sot Kenscoff
Se yon bato san kapitèn k’ap derive sou lanmè,
Yon avyon san motè k’ap pèdi altitid,
Yon bekàn san gidon k’ap degringole yon pant.

Anpil fwa se lanmou sa n’ap chache
Yon lanmou san fwa ni lwa
San ke ni tèt
Yon lanmou tèt chat
Yon lanmou san lanvè san landwat
Yon lanmou nou pa ka konprann
Yon lanmou ki just … « pataswèl »