Pandan mwen « lock »

Yon mwa, yon semenn, depi nou chita, n’ap konte mouch, n’ap kalkile, n’ap reflechi, n’ap fè kòm si…

Yon mwa, yon semenn. Men konsa tou li ka kat mwa, yon semenn, depi bouske lavi pou fanmi nou tounen yon aritmetik pwoblèm sèlman. Nou prèske pèdi sans lavi nou paske anpil moun vle fè nou konprann, nou se nannan pwoblèm lan. Yo vle fè nou santi nou se yon bann moun tèt van ki pa itil sosyete a e ki ta dwe menm al nan prizon paske se fòt nou si gen tout chat vòlè bè sa yo nan yon peyi. Alòs, nan kouri dèyè sistèm, se dèyè nou menm (pwofesè lekòl, direktè, menajè, travayè skolè, elatriye) y’ap kouri. Yo barikade nou lakay nou, yo menase lavi nou, yo vle fè nou fou paske demen nou, avni nou, prèske pa egziste ankò.

E si m rele anmwe, èske n’ap tande m’ ? Si m’ eksplike nou konbyen lòt bagay ki depann de lekòl, èske n’ap konprann ki mal n’ap fè peyi sa ? Mwen pa pou gouvènman, mwen pa pou opozisyon, mwen se patizan lavi. Yon lavi ki prèske pa vle di anyen an Ayiti paske tribòbabò n’ap sakrifye l’. Tout gwoup ap tire sou kòd peyi a san yo pa wè si li kòmanse ap defiloche. Sa vle di li ka rete li kase, chak gwoup ap gen yon bout, men okenn gwoup p’ap rive gen kòd la nèt. Lè sa, zanmi, kisa n’ap fè ? Eske n’ap chita nan ma labou santi, nan gwo pil fatra pou nou kriye mizè n’ ? Eske se lè sa n’ap resi gade lòt nan je pou nou eseye mete ansanm pou nou retrese kòd la ? Reflechi pou nou wè si l’ap posib ankò pou nou fè sa…

E si m di « tanpri », eske n’ap gen pitye ? Pandan nou kenbe m’ an otaj, ki moun ki pral peye dèt mwen yo? Eske si m’ lage nan mande, n’ap vle ede m’? Si ou se doktè, enjenyè, avoka, antreprenè, ti machann tout kalite :
a) Eske klinik fèmen tou ?
b) Eske chantye kanpe ?
c) Eske tribinal pa travay ?
d) Eske tout biznis pa fonksyone ?
e) Eske bak yo rete nan depo?

Reponn mwen non, souple. Paske mwen pa soti, kidonk mwen pa wè lari. Jiskilè m’ap jwenn kle desten m ? Eske m mèt di timoun yo, elèv mwen yo, ane lekòl la pèdi ? Eske mwen mèt anonse yo ke nan batay pou sove lavi yo, nou gaspiye avni yo ? Reponn mwen non, souple. Di mwen kisa pou mwen di yo paske pandan m’ap ekri mo sa yo, mwen kwè mwen gentan bay tout rès pawòl ki te rete nan trip mwen. Mwen t’ap vann yo lespwa. Mwen vle kontinye vann yo lespwa, men mwen pa vle pase pou yon moun k’ap reve.